شنو هي منحة سوبر عراقي؟
احنه نؤمن انو كل انسان عراقي عنده قوة بداخله، تخليه يكدر يتحمل الظروف الصعبة الي تولدت نتيجة صعوبة الحياة الي ترعرعنا بيها، بس احنة اغلبنا عايشين حياتنا بدون ان ندرك هذه القوة الي عدنا، والي بالحقيقة لو استغليناها فهي راح تمكننا من ان نستثمر اصغر واكبر الفرص الي تمر علينا بالاصرار والعزيمة الي عندنا. واحنه مو الوحيدين، اكو ناس هواية اخريين طالعين من ظروف صعبة ادركو هاي القوة عندهم وغيرو حياتهم بعد ما عرفو بيها واستغلوها! قلبو بالستوري ادناه حتى تتعرفون عليهم وعلى قصصهم:
لذلك اطلقنا هذه المنحة، حتى نشتغل سوية وية الناس الي عدهم الاستعداد ان يطلقون العنان لقوة الاصرار الخارقة مالتهم وجاهزين ان يبذلون جهد ويكونون متفانين حتى يحققون احلامهم.
من خلال منحة سوبر عراقي، راح ندعم اشخاص حتى يخوضون تجارب مفيدة تقربهم من تحقيق احلامهم.
كملو بالقراءة حتى تتعرفون على:
- امثلة لتجارب مفيدة لأشخاص اخرين.
- شنو نوع الدعم الي نوفرة.
- طريقة التقديم على المنحة.
- طريقة دعم المنحة.
امثلة على تجارب مفيدة
- هذا الصديق رام، بعد تقديمه وحصوله على القبول بوحدة من احسن المدارس بالعالم الي اسمها UWC احتاج مساعدة مالية حتى يغطي تكاليف السفر والمعيشة. رام يريد يروح لهذي المدرسة حتى يتعلم العزف وعلم النفس. تكدرون ان تشوفون قصة رام الكاملة بالضغط على الروابط التالية:
- احد الاصدقاء يريد ان يخوض بتجربة السفر والعمل على مشاريع فنية بالريف بتركيا، فبحث ووجد مزرعة معينة بمدينة موراتلار تستقبل ضيوف وبالمقابل يساعدهم بشغل المزرعة كم ساعة باليوم، بس هذا الصديق ممجرب السفر بالسابق ويحتاج توجيه حتى يخطط رحلة السفر مالته.
- الصديقة مينا دتتعلم تصميم الاثاث وعندها فكرة مشروع تصميم كرسي من الخوص العراقي بالتعاون مع حرفيين عراقيين حتى هم تسوي تصميم جديد مميز يبرز التراث العراقي وهم تتعلم من الحرفيين المحليين. المشروع يتطلب مواد اولية تحتاج ان تشتريها مينا وتحتاج مساعدة مادية حتى تشتريها.
- احدى الصديقات تواجه صعوبات بالتواصل والتعامل مع المجتمع ومقضية حياتها معضمها ممختلطة بناس غير اهلها واصدقائها المقربين. صديقتنا تريد ان تتغلب على هذه الرهبة وتبدي تختلط بمجتمع داعم ومتقبل ومابي تنمر. وعندها طموح كبير ان تصير عندها القابلية ان تتحدث كدام جمهور كبير بدون ان يصير عندها رهبة وتحتاج الى تدريب بهذا المجال والى فرص تتيحلها ان تجرب هذا الشي.
- الصديق اسامة كلش يحب الرياضة ويعتبرها جزء اساسي من حياته ويحب ان يشارك شغفه هذا ويه اهل مدينته فيريد ينظم بطولة برياضة الساحة والميدان ويستقطب طلاب المدارس حتى يقضون وقتهم على اشياء نافعة بدل ما يضيعون وقتهم بالمقاهي وصالات الالعاب فقط.
انواع الدعم الي تقدمه المنحة
الدعم الي رح نقدمه للمستفيدين من هذه المنحة يتضمن:
- دعم مادي: دعمنا المادي محدود يكفي ان يغطي تكاليف بسيطة. امثله على التكاليف الي ممكن نوفر الها دعم مادي:
- السفر
- المعيشة
- النقل
- الادوات او المواد الاولية
- وغيرها من التكاليف البسيطة الي ممكن ان نساعد بيها
- تدريب: المستفيدين من المنحة ممكن ان يحصلون على نوعين من التدريبات:
- تدريبات مقدمة من قبل فريق المنحة
- تدريبات مقدمة من قبل اشخاص ومؤسسات اخرى ممكن ان توصلولها بمساعدة فريق المنحة
- علاقات مع اشخاص محققين انجازات بحياتهم وحابين ان يساعدون غيرهم بتحقيق انجازاتهم الخاصة (مثل الاشخاص الشفتوهم بالستوريات فوق).
مو ضروري من كل المتقدمين ان يريدون هذي الخدمات كلها، فاحنة رح ندعمكم بالطريقة التناسبكم.
طريقة التقديم الى المنحة
املأ استمارة التقديم بالكبس على الزر ادناه، وحتى تزيد من فرصتك ان تنقبل، فكر ملياً بأسئلة الاستمارة وجاوب عليها بتأني وراجع كتاباتك قبل مترسلها.
استمارة التقديم رح تبقى مفتوحة الى يوم ١٥-١-٢٠٢٢ الساعة ١١:٥٩ مساءاً وبعدها رح نعتذر عن استلام المزيد من التقديمات.
قدم على منحة Super Iraqisطريقة دعم المنحة
بالنيابة عن المشاركين بالمنحة، نحب ان نرحب بكل الاشخاص الي يحبون ان يساهمون بالتغيير عن طريق الدعم الي يقدمو للمشاركين.
اكبس على الزر ادناه وشاركنا بالطريقة الي تفضل ان نتواصل بيها وياك وكذلك وصف عن شنو هو نوع الدعم الي حاب ان تقدمه للمنحة وراح نتواصل وياك بعد ان يوصلنا ارسالك.
ممتنين لدعمكم.
ادعم منحة Super Iraqis