الموقع
منطقة التخييم رح تكون بداخل منتجع بابل السياحي بالقرب من
- اثار بابل
- بوابة عشتار
- اسد بابل
- وقصر صدام
المكان الي راح نسوي بي التخييم رح يكون مكان محاط باشجار وحشائش.
اتطلعو على الصور ادناه حتى يصير عندكم تخيل اوسع عن الموقع.
منتجع بابل السياحي، نهر الفرات، ومنطقة التخييم
اثار بابل
اسد بابل
الوقت
- راح نستقبلكم عند المخيم يوم الخميس ١٨\١١ الساعة ٢ الظهر قرب بوابة منتجع بابل.
- اليوم الثاني، المصادف الجمعة ١٩\١١ راح ننهي رحلتنا على الساعة ١٢ الظهر وكل واحد يرجع لمنطقته.
النقل
بعد ما يتثبت عدد المشاركين بالرحلة، راح نربطكم وية المشاركين الاخرين الي ساكنين قريب من عندكم حتى تنظمون النقل الى بابل بيناتكم.
- قسم من المشاركين رح يكون عندهم سيارات خاصة راح يجون بيها وممكن ان يستقبلون مشاركين اخرين وياهم بسياراتهم.
- ممكن ان تنسقون وية سواق من الكراج الي بمنطقتكم ان يوصلوكم الى كراج الحلة ومن هناك ممكن ان تصعدون تكسي الى منطقة التخييم.
- بعض من المحافظات رح يكون اكو عدد كبير قادمين من عندها، فممكن ان تأجرون سيارة بيناتكم تجيبكم مباشرةاً الى منطقة التخييم ببابل.
بالاخير انحب ان نقترح ان متشيلون هم لمسألة النقل. ممكن ان نساعدكم بترتيبها بعد ان يتم قبولكم للمشاركة بالرحلة.
التكاليف
احنة راح نغطي تكاليف تنظيم رحلة التخييم وحجز المكان والحصول على الموافقات الامنية، والمشتركين رح يغطون تكاليف النقل والاكل واي شي ثاني يحتاجو اثناء السفرة. ادناه قائمة تدرج التكاليف اللي تحتاجون ان تاخذوها بنظر الاعتبار:
- النقل: تكاليف النقل تختلف حسب المنطقة الي رح تجون منها. افضل طريقة للاستفسار عنها هي بالتواصل مع السواق الي بالكراج. تكاليف التكسي من كراج بابل الى منطقة التخييم تتراوح بين الـ٤٠٠٠ والـ٥٠٠٠ دينار.
- الاكل: بالليلة الاولى راح نشوي وجبة عشاء على الحطب. الي يحب ان يشارك بيها فرح تكون تكلفتها ٤٠٠٠ دينار للشخص. هذه الوجبة اختيارية ومو الكل ملزم ان يشترك بيها.
- في حال الاشخاص النباتيين بالامكان ان تجيبون الاشياء الي تحبون ان تشووها مثل الذرة وغيرها.
- معدات التخييم والمبيت: تتضمن معدات التخييم التالي:
- الغطوة: فد شي تجيبو وياكم تنامون عليه او تتغطون بي.
- الخيمة: اذا عندكم خيمة، جيبوها وياكم. اما اذا ماعندكم، فاكو خيارين:
- المبيت بدون خيمة: الكثير من المخيمين ينامون بدون خيمة حتى يستمتعون بمنظر السماء والنجوم والقمر قبل النوم وكذلك حتى يوفرون على نفسهم تكاليف الخيمة.
- المبيت داخل خيمة: قسم من المخيمين يفضلون ان ينامون داخل خيمة حتى يكون اكو خصوصية اكثر. تكاليف الخيمة الي تحوي ٣ اشخاص هي ٢٥ الف دينار. فيعني اذا حابين ان تشترون خيمة وتشتركون بيها مع شخصين اخرين، فتوقعو انه تحتاجون ان تدفعون تقريباً ٨,٥٠٠ دينار. اذا حابين ان تباتون بخيمة وماعندكم وحابين تدفعون تكاليفها، انطونه علم حتى نحسب حسابكم ومن توصلون نستلم المبلغ من عندكم.
جدول الرحلة
اليوم الاول: الخميس ١٨\١١
راح نستقبلكم على الساعة ٢ الظهر بموقع التخييم. اول شي راح نتجمع ونتعرف على بعض ونسوي فعاليات لبناء الاواصر بيناتنا. بعدها راح نحضر الغروب سوية ونتناقش بمواضيع بناءة ونتشارك بالتجارب والخبرات. بعد الغروب رح نفتح النار، نشوي العشاء عليها ونتدفىء بيها، وبعدين نتعشى سوية. واخر شي نسوي وحدة من اكثر فعاليات التخييم تفضيلاً والي هي نتجمع حول النار ونسمع موسيقى هادئة او نستمتع بعزف المشاركين الي عدهم آلآت عزف واكيد اغلب العراقيين هم شعراء فنسمع قصائدهم ونلعب ونسولف ونستمتع بجمال الطبيعة.
اليوم الثاني: الجمعة ١٩\١١
نستيقظ قبل الشروق ونحضر شروق الشمس سوية. بعدها نبدي نحضر الفطور ونسوي رياضة حتى نصحصح زين. بعد الفطور نبدي بجولة استكشافية بآثار بابل وقصر صدام.
اخر شي نختم الرحلة على الساعة ١٢ ظهراً وكل واحد يرجع لبيتهم بالطريقة الي هو نسقها.
منو راح يحضر؟
راح يتضمن الحضور على الاشخاص الي التقينا بيهم اثناء جولتنا بالموصل والانبار وبغداد وبابل وكذلك اشخاص اخرين مهتمين بالتخييم. بالاضافة الى ذلك رح يحضر ويانا اشخاص ذوي خبرات مختلفة مثلاً عازفين وفنانين ومبرمجين وغيرها حابين ان يوفرون خدماتهم للمشاركين ويكونون اصدقاء جدد.
شنو تجيبون وياكم؟
- ملابس خفيفة لانه الجو حار اثناء النهار
- ملابس سميكة لانه الجو بارد اثناء الليل
- غطوة تنامون عليها وتتغطون بيها
- خيمة اذا عندكم
- اي شي حابين تجيبو حتى تشاركونا بي، مثلاً آلة موسيقية او ادوات رسم او كرة قدم او اي شي انت تحب ان تشارك المجموعه بي.
- مهما كان التريدون ان تجيبو ليكون هواي حتى ما تتضايقون اثناء الجولة وعلمود تستمتعون اكثر (الاشياء الاساسية)
اخر موعد للتقديم
رح ينسد التقديم يوم الاربعاء الساعة ٨ صباحاً، لكن كل ماتقدمون اوكت كل ما تزيد فرصتكم بالقبول.
سجل حضورك