الفكرة
تخيل اكو مركز شبابي بمدينتك تقدر تلتقي بي مع ناس اخرين عندهم نفس اهتماماتك ويحبون يسمعولك ويشجعوك ويشتغلون وياك وانت تعتبرهم اصدقائك تشاركهم الحلوة والمرة. ما يسمعوك كلام سيء ولا يتنمرون لو يقلدون عليك من تطرح عليهم افكارك الابتكارية. بهذا المركز تشتغلون على مشاريع سوية بالاشياء الي انت تحبها وتتناقشون بمواضيع مثيرة للاهتمام وتتونسون سوية وتطلعون سوية. هذا الحلم ممكن يكون حقيقة واحنا نريد نتعاون سوية وياك حتى نحقق هذا الحلم!
خلال الاسابيع القادمة، راح يكون عدنا جولة بالعراق نجمع بيها الناس حتى نبني مجتمعات مثل الي تخيلناها فوق سوية! جولتنا راح تمر بالموصل والانبار وبابل وبغداد وحيكون وياية ابو بكر ومعتز، الي هم ٢ من خريجين برنامج الـGap Year واشخاص اخرين رائعين يحبون ان يأسسون مجتمعات محلية حتى الناس الي مثلي ومثلكم يكون عدهم مكان يلتقون بي. هذه المجتمعات ما محصورة لفئة معينة وترحب بكل الاختصاصات والمجالات سواء كانت الفن والتكنولوجيا والتعليم والعلم او اي شي اخر يفيد الناس بالاضافة الى ان يتونسون سوية ويلعبون سوية.
التخييم
راح ننهي جولتنا برحلة تخييم بمحافظة بابل 🏕😍 وراح ندعو كل الاشخاص الي يشاركون تجمعاتنا الى رحلة التخييم. بس اذا ما تگدرون تحضرون التجمعات، ممكن تسجلون لحضور رحلة التخييم فقط.
جدول الجولة
- تشرين الثاني (شهر ١١) ٥ - ٩: الموصل
- تشرين الثاني (شهر ١١) ١٠ - ١٤: الانبار
- تشرين الثاني (شهر ١١) ١٥ - ١٦: بغداد
- تشرين الثاني (شهر ١١) ١٧ - ١٨: بابل
- تشرين الثاني (شهر ١١) ١٨ - ١٩: سفرة التخييم في بابل 🏕🔥
اذا انتو ساكنين بقرب وحدة من هذي المدن، تعالو واشتركو ويانا!
واذا ساكنين بعيد عن هذي المدن، كذلك ممكن تشتركون ويانا بسفرة التخييم.
اضغط على الزر ادناه حتى يصير عندنا طريقة للتواصل وياكم ونرسل تفاصيل الجولة (الوقت، المكان، الخ).
سجل حضورككلش متشوقين ان نلتقي بيكم ومليانين حماس! 😃🥳
تفاصيل اكثر
اذا حابين تتعرفون اكثر عن خطة فعاليات الرحلة، ممكن تتطلعون على التفاصيل ادناه:
تفاصيل رحلة التخييم
رح نسوي رحلة تخييم وية علي ادفنجر في محافظة بابل. رح نعلن عن طرق النقل وموقع التخييم بالتحديد على قناة التلغرام قريباً. رح نوفر اماكن مخصصة لتخييم البنات مؤمنة ومنعزلة عن اماكن نوم الذكور.
راح ننهي جولتنا برحلة تخييم بمحافظة بابل 🏕😍 وراح ندعو كل الاشخاص الي يشاركون تجمعاتنا الى رحلة التخييم. بس اذا ما تگدرون تحضرون التجمعات، ممكن تسجلون لحضور رحلة التخييم فقط.
تفاصيل رحلة الانبار والموصل
رح يكون جدول رحلة الانبار ورحلة الموصل متشابه، مجرد بأختلاف المواعيد. رحلة الموصل رح تكون من يو الجمعة ٥\١١ الى يوم الثلاثاء ٩\١١ ورحلة الانبار رح تكون من يوم الاربعاء ١٠\١١ الى يوم الاحد ١٤\١١
اليوم الاول: التعارف والانطلاقة
بعد حضوركم الى مكان الفعالية، رح نتعرف واحد على الثاني، بعدين حيكون عندنا نقاش عن فكرة المجتمع الي نريد نبني ونتطلع على مجتمعات اخرى ناجحة حتى نتعلم من عندهم ونسوي مثلهم.
المخرجات الاساسيةالي نريد نطلع بيها من هذا التجمع هو
- العلاقات الي رح نبنيها مع بعض
- نحدد شنو هي النواقص الي موجودة بالمجتمع الي عايشين بي والي نحتاج ان نوفرها بمجتمعنا
اليوم الثاني: التخطيط
بهذا اليوم رح نتعاون حتى نوضع خطة عمل للمجتمع الي رح نبني. قسم من الحضور رح يطرحون افكار يحبون ان يشتغلون عليها بمساعدة باقي اعضاء المجتمع حتى يحققوها. مثلاً:
- مصطفى عندة فكرة ان يشوف العالم وضع الموصل بعد اربع سنوات من تحرير الموصل من داعش
- فممكن اعضاء من المجتمع يتبرعون ان يساعدون مصطفى بالتصوير، بالكتابة، وبالنشر حتى مصطفى يحقق مشروعة
- شيماء شافت هذا الفديو
“
Nas Daily !كيف قام هذا الرجل بزراعة غابة
”
ورادت هي هم تسوي غابة بالچولة الي بمنطقتها.
- ممكن شيماء وفريق من اعضاء المجتمع الي يحبون يساعدوها يتعاونون على ان يزرعون شتلات بالمنطقة وخلال كم سنة هاي الشتلات تكون منطقة خضرة تخبل
هذه مجرد مثالين على شنو نوع الافكار الي ممكن ان نطلع بيها ونكون خطط حتى نطبقها، بس الخيارات هوايه وكل عضو ممكن ان يشتغل على الشي الي هو يتونس بي ويحبه.
المخرج الي رح نطع بي من هذا اليوم انه نكون فرق عمل عدهم خطط تنفيذ واضحة
اليوم الثالث والرابع: البناء
هذه الايام رح تكون مخصصة لتطبيق الخطط الي انوضعت. ببساطة شغل وونسة للاخير!
اليوم الخامس: المعرض
باليوم الاخير رح نسوي معرض للاعمال الي صارت خلال الـ٣ ايام الفاتت وكذلك مشاريع اخرى مشتغلين عليها ناس من داخل المحافظة، نجيبها كلها سوية ونعرضها بطريقة حلوة وندعو الناس من الاهل والاصدقاء وناس اخريين حتى يحضرون ويشوفون الشغل الي كدرو يحققو ناس الموصل والانبار.
تفاصيل رحلة بغداد
رحلة بغداد بعدها تحت التخطيط. قريباً رح نعلن التفاصيل. اشترك بقناة التلغرام حتى توصلك التفاصيل من نعلنها
تفاصيل رحلة بابل
رحلة بابل بعدها تحت التخطيط. قريباً رح نعلن التفاصيل. اشترك بقناة التلغرام حتى توصلك التفاصيل من نعلنها