فكرة التحدي
يهدف تحدي ٢٩ يوم لجعل كل مشترك يدخل بتحدي مع نفسه ولمدة ٢٩ يوم لتطوير مهاراتهم وخلق علاقات جديدة بين المشاركين وتكوين مجتمع صغير يدعمون بي بعضهم. بعد انتهاء التحدي، يتم اختيار ٨ - ١٠ مشاركين من الي اظهرو التزام عالي وتقدم واضح للسفر الى تركيا وخوض تجارب جديدة مع فريقنا مثل التخييم.
شروط المشاركة
التحدي مفتوح للجميع، بكل الاعمار والخلفيات ولا يوجد شروط او متطلبات معينة حتى تشارك. فقط تحتاج تتبع الخطوات المطلوبة.
طريقة المشاركة
- القي نظرة على التعليمات الموجودة هنا
- املي هذي الاستمارة
- سوي حساب جديد على منصة Discourse
- انشر اول مدونة الك حسب التعليمات المذكورة بالمصادر اعلاه
فائزين الموسم الاول
بعد انتهاء الموسم الاول من تحدي ٢٩ يوم، اختارينا ٧ فائزين سافرو الى تركيا حتى يشاركون بالتدريبات والتخييمات الحضورية. هذي نبذة عن تجاربهم:
ايات
سافرت ويا اشخاص ما اعرفهم وجان هذا تحدي كبير، بعد مدة صارو عائلة ثانية الي، اكسبني هذا الشي ثقة بنفسي. تجربتي جان بيها هواي حب، هواي امتنان.
احمد
هذه التجربة غيرت من شخصيتي، التقيت بناس جديدة خلوني احس بالامان واعبر عن مشاعري واواجه مخاوفي. راح انقل تجربتي للبيئة الي اني عايش بيها بالعراق.
زينب
كمية الحب والطاقة والمشاعر الي عشتها بهذه التجربة ما تتعوض، كل شي هنا ينطو حقه، ينطون الشخص حقه، التجربة ينطوها حقها. جان كل شخص معلم بالنسبة الي.
عبيدة
توقعت هذه السفرة حالها من حال اي رحلة سياحية، بس طلعت كلش مختلفة، عشنا التجربة فعليا، سبحنا، سوينا تخييم، جمعنا حطب، نقعد نسولف حول النار، ناخذ جلسات تعليمية، وتعملنا الامتنان والحضن.
افنان
الكل جان يحبون بعض ويهتمون لبعض، وكل ما جنت اكعد وحدي بعيد عن المجموعة يجي احد يحجي ويايا وبعدين يرجعوني للمجموعة، ومرة ضعت بالغابة وبقو يدورون عليا، ومن لكوني وشفتهم شلون خايفين عليا، حسيت انو هم صدك يحبوني واني مهمة عدهم.
ابراهيم
تحدي ٢٩ يوم رهيب، تعلمنا هواي اشياء وانسجمت مع الجميع وكأنو اعرفهم من سنوات.
بنين
تسلقت اشجار وطلعت لمكان مرتفع، تعلمت اسبح وما جنت اتصور ابد ان اتعلم بهذه السرعة، متفاجئة من نفسي لان جنت اتصور ما اكدر اتعلم بهذه السرعة. اني انسانة انعزالية بس من التقيت بالمجموعة حسيتهم عائلتي، هذه التجربة فاقت توقعاتي.